Qashqadaryoda 1 trln so‘mdan ortiq investitsiya loyihalari amalga oshiriladi

2025-yilda Qashqadaryo viloyatida umumiy qiymati 1,03 trln so‘mlik 50 ta yangi investitsiya loyihasini amalga oshirish rejalashtirilgan. Ushbu tashabbuslar natijasida $80 mlnlik import o‘rnini bosish va 385 ta yangi ish o‘rni yaratish ko‘zda tutilgan.

Muhim loyihalardan biri — Koson tumanida “Rapid Rais Texnoprom” tomonidan amalga oshirilayotgan metall uskunalar va buyumlar ishlab chiqarish zavodi bo‘lib, loyiha qiymati $25 mlnni tashkil etadi. Yillik quvvati 3,2 ming tonnaga teng bo‘lgan ushbu korxona 150 ta ish o‘rni yaratadi, $4 mlnlik eksport amalga oshiradi hamda byudjetga 10 mlrd so‘m tushum keltiradi.

Shuningdek, Qarshi shahrida “Nasaf XCP Techno” tomonidan yiliga 35 ming tonna polietilen ishlab chiqarish loyihasi yo‘lga qo‘yiladi. $8 mlnlik ushbu loyiha orqali 65 ta ish o‘rni yaratiladi, $30 mlnlik import o‘rnini bosish hamda byudjetga 5 mlrd so‘m tushum ta’minlash rejalashtirilgan.

Viloyatda ishlab chiqarishni kengaytirish va yangi yo‘nalishlarni yo‘lga qo‘yish ham ustuvor yo‘nalishlardan. Jumladan, ilgari ishlab chiqarilmagan 66 turdagi mahsulotni mahalliylashtirish ko‘zda tutilgan. Hozirda korxonalarning 70%i to‘liq yoki yuqori quvvatda, 12%i esa to‘liq raqamlashtirilgan holda faoliyat yuritmoqda. Yana 78%i raqamli texnologiyalarni qisman joriy etgan.

Shunga qaramay, so‘rov natijalariga ko‘ra, korxonalarning 30%i ishlab chiqarish quvvatining yetarlicha yuklanmaganini bildirgan. Ayrim korxonalar faqat 20–30%, boshqalari esa 40–50% quvvatda ishlamoqda. To‘liq quvvatga chiqish esa qo‘shimcha ish o‘rinlari yaratish va soliq tushumlarini oshirish imkonini beradi.

Qashqadaryo viloyati import o‘rnini bosuvchi mahsulotlar ishlab chiqarishda katta salohiyatga ega. Jumladan, $96 mln qiymatdagi elektrotexnika mahsulotlari, $19 mlnlik nasos uskunalari, shuningdek $6,4 mlnlik farmatsevtika va tibbiyot tovarlarini mahalliylashtirish imkoniyati mavjud. Masalan, “Trade and Sales Professionals” kompaniyasi svetoforlar, “Muborakneftgazta’mir” va “Agrotexsuvmontaj” esa nasoslar ishlab chiqarish loyihalarini ko‘rib chiqmoqda.