Xitoy kompaniyasi Surxondaryo viloyatida pullik avtomagistral qurmoqchi

Xitoy kompaniyasi Surxondaryo viloyatida pullik avtomobil yo’lini qurmoqchi. Bu haqda viloyat hokimligi matbuot xizmati ma’lum qildi.

Viloyat hokimi Ulug’bek Qosimov «Hunan Industrial Equipment Installation Co., Ltd.» delegatsiyasi bilan uchrashdi. Ular barcha zarur shart-sharoitlar va qulayliklarni o’z ichiga olgan pullik avtomobil yo’lini qurish loyihasini muhokama qilishdi. Ushbu yo’l M41 Bishkek–Dushanbe–Termiz avtomobil yo’liga parallel ravishda qurilishi rejalashtirilgan, uning uzunligi 171 kilometrni tashkil etadi.

Muzokaralar davomida yo’l qurilishining ekologik-iqtisodiy jihatlariga, shu jumladan aholi punktlari va daraxtlarning ta’sirini minimallashtirishga va atrof-muhitga salbiy ta’sirini kamaytirishga alohida e’tibor qaratildi. Natijada, mutaxassislar ishtirokida loyihani takomillashtirish bo’yicha birgalikda ishlash to’g’risida qaror qabul qilindi.

«Hunan Industrial Equipment Installation» kompaniyasi Xitoyning eng yirik kompaniyalaridan biri bo’lib, o’zining 66 yillik tarixida 40 ming kilometrdan ortiq pullik yo’llarni qurgan.