Saida Mirziyoyeva O‘zbekiston prezidenti administratsiyasi rahbari etib tayinlandi

Saida Shavkatovna Mirziyoyeva O‘zbekiston Prezidenti Administratsiyasi rahbari lavozimiga tayinlandi. Bu haqda Prezident matbuot xizmati ma’lum qildi.

Mazkur lavozim davlat rahbarining farmoni bilan Administratsiya tuzilmasidagi o‘zgarishlar doirasida joriy etildi.

Shuningdek, Prezident farmonlariga muvofiq:

• Bekzot Mardonovich Mavlonov Prezident yordamchisi etib tayinlandi va huquqiy ekspertiza hamda kompleks tahlil masalalari bo‘yicha maslahatchi lavozimidan ozod etildi;
• Aziz Yuldashevich Magrupov Prezidentning tashqi investitsiyalar masalalari bo‘yicha maslahatchisi etib tayinlandi. Ilgari u Prezident yordamchisi lavozimida faoliyat yuritgan.

Bundan tashqari, Komil Allamjonov Prezident Administratsiyasi rahbarining shtatdan tashqari maslahatchisi etib tayinlandi. U innovatsion iqtisodiyotni rivojlantirish, investitsiyalarni jalb etish, shuningdek so‘z erkinligini ta’minlash va mustaqil ommaviy axborot vositalarini qo‘llab-quvvatlash bo‘yicha maslahat beradi.