Madaniyat vaziri Ozodbek Nazarbekov xususiy oliy ta’lim muassasasi videosida ko‘rindi

Madaniyat vaziri Ozodbek Nazarbekov Kokand Universityning Andijon filiali videosida qatnashdi. Video oliy ta’lim muassasasining Instagram sahifasida e’lon qilindi, unda vazir yoshlarga ushbu universitetga o‘qishga kirishni maslahat bermoqda.

Uning ishtirokining qonuniyligiga oid savollar paydo bo‘ldi. Jumladan, “Reklama to‘g‘risida”gi qonunning 16-moddasida tovar yoki xizmat davlat organlari yoki mansabdor shaxslar tomonidan ma’qullanganligini ko‘rsatish bevosita taqiqlanadi. Bunday hollarda choralar amaldorga emas, balki reklamani joylashtirgan tashkilotning o‘ziga nisbatan qo‘llanilishi mumkin.

Bundan tashqari, “Davlat xizmati to‘g‘risida”gi qonunning 13-moddasi davlat xizmatchilarining faoliyatini cheklaydi: ularga pedagogik, ilmiy va ijodiy faoliyatdan tashqari boshqa haq to‘lanadigan ish bilan shug‘ullanish, shuningdek, xususiy shaxslar va kompaniyalardan ularning manfaatlarini ko‘zlab qilgan harakatlari (yoki harakatsizligi) uchun mukofot yoki sovg‘alar olish taqiqlanadi.

Madaniyat vazirligi vaziyatga izoh berar ekan, rolikning reklama emasligini ta’kidladi. Vazirlikning ma’lum qilishicha, yozuv Andijon viloyatidagi yoshlar bilan uchrashuv doirasida olingan bo‘lib, “ijtimoiy foydali axborot” xususiyatiga ega ekan.

Bu kabi holat ilk bor yuz bermayapti. 2024-yilda Nazarbekov “KINGSMAN UZBEKISTAN” kiyim-kechak do‘koni reklamasida ko‘ringan edi. O‘shanda Raqobatni rivojlantirish qo‘mitasi komissiyasi do‘konni qoidabuzar deb topib, davlat organi nomidan foydalangani uchun jarimaga tortgan. Vazirning xatti-harakatlarida esa qoidabuzarlik aniqlanmagan, chunki u rolikning na buyurtmachisi, na tarqatuvchisi bo‘lgan.