O‘zbekistonda o‘ziga kredit ajratilishini taqiqlash xizmati ishga tushdi

Fuqarolar o‘zlarining ishtirokisiz qarzlarni o‘z nomlariga rasmiylashtirish imkoniyatini istisno qilish uchun ariza berishlari mumkin

Фото: Абдумавлон Мадмусаев / Kapital.uz

“Kredit-axborot tahliliy markazi” kredit byurosi 6-iyundan boshlab jismoniy shaxslarga o‘ziga kredit ajratilishini taqiqlash imkonini beruvchi xizmat ishga tushirilganini ma’lum qildi.

Ya’ni, byuro “jismoniy shaxslar to‘g‘risidagi ma’lumotlarni kredit bitimi tuzishi taqiqlangan shaxslar reyestriga kiritish yoki reyestrdan chiqarish bo‘yicha” xizmatni joriy qilgan.

Mazkur xizmat orqali jismoniy shaxslar o‘zlarining ishtirokisiz yoki xabarisiz kredit bitimi rasmiylashtirilishining oldini olish uchun o‘zi bilan kredit bitimini tuzishni kredit byurosiga ariza kiritish orqali taqiqlash imkoniyatiga ega bo‘ladi.

Bu o‘z navbatida bugungi kunda o‘sib borayotgan jismoniy shaxslarning xabarisiz kreditlar rasmiylashtirilishi holatlarining oldini olishga turtki bo‘ladi. Ushbu xizmat bepul bo‘lib, undan dastlab Kredit byurosining rasmiy veb-sayti orqali foydalanish mumkin, — deyiladi xabarda.

Eslatib o‘tamiz, 20-fevral kuni Senat bu haqdagi qonunni ma’qullangan edi.