O‘zbekiston va Eron $1 mlrd miqdoridagi investitsiya loyihalarini imzoladi

11-may kuni Tehron shahrida O‘zbekiston bosh vaziri Abdulla Aripov va Eron birinchi vitse-prezidenti Muhammad Rizo Orif raisligida O‘zbekiston va Eron hukumat delegatsiyalarining uchrashuvi bo‘lib o‘tdi.

Uchrashuvda ikki tomonlama hamkorlikning asosiy masalalari, jumladan, savdo-iqtisodiy aloqalarni kengaytirish, tovar ayirboshlash hajmini $2 mlrdga yetkazish, sanoat kooperatsiyasini rivojlantirish va transport-logistika zanjirlarini mustahkamlash masalalari muhokama qilindi.

Tomonlar fan, texnologiyalar, ta’lim, turizm va madaniy-gumanitar almashinuv sohalaridagi hamkorlikni faollashtirish muhimligini qayd etdilar. Erishilgan kelishuvlarni, shu jumladan, tegishli vazirlik va idoralar darajasida jadal amalga oshirish zarurligi ta’kidlandi.

Muzokaralar yakunida quyidagilar imzolandi:

• 2025-2027-yillarda hamkorlikni mustahkamlash bo‘yicha yo‘l xaritasi;
• imtiyozli savdo to‘g‘risidagi bitim bo‘yicha tovarlar ro‘yxatini tasdiqlash to‘g‘risidagi bayonnoma;
• o‘simliklarni himoya qilish va karantin sohasida hamkorlik to‘g‘risida memorandum;
• halol standartlar sohasida hamkorlik to‘g‘risida memorandum.

Shu kuni Tehronda Eron va O‘zbekiston o‘rtasida tashkil etilgan biznes-forum bo‘lib o‘tdi, unda 100 dan ortiq tadbirkorlar ishtirok etdi. Forum davomida qariyb $1 mlrdlik investitsiya loyihalari va savdo shartnomalari to‘plami taqdim etildi.

Tadbir ishtirokchilari Eron tomonini O‘zbekistonning iqtisodiy islohotlari va salohiyati bilan tanishtirdi, shuningdek, eronlik ishbilarmonlarni Xorazm va Samarqand viloyatlarida sanoat zonalari ochilayotgan imkoniyatlardan foydalanishga chaqirdi.