AQSH O‘zbekiston tovarlariga 10% lik soliq joriy qildi

AQSH prezidenti Donald Tramp xorijdan olib kiriladigan barcha tovarlarga bojlar joriy etilishini e’lon qildi. Bu haqda u Oq uyda bo‘lib o‘tgan matbuot anjumanida ma’lum qildi.

Tramp bojxona to‘lovlari joriy etiladigan 185 davlat ro‘yxatini keltirdi. Bazaviy tarif 10% ni tashkil etadi, O‘zbekiston tovarlariga ham shuncha miqdorda boj solinmoqda. Biroq ko‘plab davlatlar uchun tariflar yuqoriroq bo‘lib chiqdi.

Xususan, Xitoydan keladigan tovarlarga bojlar 34% ni, Yevropa ittifoqi mamlakatlaridan 20% ni, Shveysariyadan 31% ni, Isroildan 17% ni, Qozog‘istondan 27% ni tashkil etadi. Vyetnam (46%), Kamboja (49%), Laos (48%) eng yuqori tariflarga ega bo‘ldi. 

Ro‘yxatda Rossiya tilga olinmagan, Meksika, Eron, Kanada va Belarus ham yo‘q. Vashington Ukraina tovarlariga nisbatan 10% lik savdo bojini joriy etishga qaror qildi.

Moldova (31%) va Qozog‘istondan tashqari, postsovet hududining aksariyat mamlakatlari uchun 10% lik boj miqdori joriy etilgan. Armaniston, Ozarbayjon, Gruziya, O‘zbekiston, Turkmaniston, Qirg‘iziston, Tojikiston shular jumlasidandir.

Tramp yengil avtomobillar, yuk mashinalari va ularning ehtiyot qismlari importiga 25% lik bojlar joriy etish to‘g‘risidagi farmoyishni imzoladi.

Oq uy rahbari bojlar kiritilishini “iqtisodiy mustaqillik deklaratsiyasi” deb atadi va 2-aprel “Amerika sanoatining tiklanish kuni” sifatida tarixga kirishini aytdi. U tariflarni olib tashlashni so‘ragan davlat rahbarlariga bojlarni bekor qilishni maslahat bermoqda.

Trampning ta’kidlashicha, “AQSHning do‘stlari va dushmanlari” o‘nlab yillar davomida Amerika iqtisodiyotini talon-toroj qilib kelgan, biroq o‘zaro bojlar joriy etilishi bilan bunga “nuqta qo‘yilgan”. Uning so‘zlariga ko‘ra, bu AQSH iqtisodiyoti uchun “oltin asr”ga olib keladi, “ish o‘rinlari va fabrikalar mamlakatga qaytadi”.

AQSH prezidenti mazkur bojlardan tushgan “trillionlab dollar” soliqlarni kamaytirishi va davlat qarzini to‘lashga yo‘naltirilishini aytdi. 

Ko‘p yillar mobaynida Amerikaning mehnatkash fuqarolari chetda qolib ketishga majbur bo‘ldi, boshqa mamlakatlar esa boy va qudratli bo‘lib bordi — ko‘p jihatdan bizning hisobimizga. Endi esa gullab-yashnash navbati bizga keldi va shu tarzda soliqlarni kamaytirish hamda davlat qarzini uzish uchun trillionlab dollarlarni sarflash imkoniyati tug‘ildi, deya ta’kidladi Amerika prezidenti.

Ma’lum qilinishicha, 10% lik bazaviy boj 5-apreldan, bir qator davlatlar uchun “o‘zaro” tariflar esa 9-apreldan amal qila boshlaydi. Tramp bojlar miqdorini o‘zgartirishi mumkinligidan ogohlantirdi.

Quyida tovarlariga bojlar solingan davlatlar ro‘yxati: