OTB Qoraqalpog‘istondagi yo‘l modernizatsiyasi uchun $230 mlndan ortiq mablag‘ ajratdi

Mablag‘lar A-380 avtomobil yo‘lini qayta qurish va To‘rtko‘l-Ellikqal’a-Beruniy aylanma yo‘lini barpo etishga yo‘naltiriladi

Фото: Shutterstock

Osiyo taraqqiyot banki Qoraqalpog‘istondagi CAREC-2 yo‘l koridori qismini modernizatsiya qilish uchun $233,1 mln miqdorida kredit ajratishni ma’qulladi. Bu haqda OTB matbuot xizmati ma’lum qilmoqda.

Loyiha G‘uzor-Buxoro-Nukus-Beynau (A-380) avtomobil yo‘lining 87 kmlik qismini qayta qurish, jumladan, 75 km uzunlikdagi yangi aylanma yo‘l barpo etish va mavjud 12 kmlik yo‘lni yangilashni nazarda tutadi. Loyihaga iqlimga chidamlilik unsurlari kiritilgan bo‘lib, ularga sement-beton qoplama, balandlashtirilgan ko‘tarmalar va ekstremal ob-havo sharoitlariga bardosh beruvchi zamonaviy drenaj tizimlari kiradi.

Bundan tashqari, OTB aqlli transport tizimlari va harakatlanayotgan transport vositalarini avtomatik tortish texnologiyalarini o‘rnatishda ko‘maklashadi. Yo‘l bo‘ylab beshta dam olish va xizmat ko‘rsatish maskani, shu jumladan elektromobillarni quvvatlash stansiyalari hamda gender jihatlarini hisobga olgan holda infratuzilma barpo etish rejalashtirilmoqda.

Loyihaning umumiy qiymati $293,7 mlnni tashkil etib, shundan $60,6 mlnni O‘zbekiston hukumati ta’minlaydi. Ushbu tashabbus 2030-yilgacha bo‘lgan mamlakatni rivojlantirish strategiyasi hamda OTBning iqlim barqarorligi, gender tengligi va mintaqaviy integratsiyani o‘z ichiga olgan ustuvor yo‘nalishlariga to‘la mos keladi

O‘zbekiston 1995-yilda OTBga a’zo bo‘lganidan buyon kreditlar, grantlar va texnik ko‘makni o‘z ichiga olgan moliyaviy yordamning umumiy hajmi $14,3 mlrddan oshdi. Joriy yil Bank va Respublika o‘rtasidagi hamkorlikning 30 yilligini nishonlamoqda