O‘zbekistonda tijorat banklari omonat stavkalarni pasaytirdi

Markaziy bank fevral oyida o‘rtacha omonat stavkasi yillik 19,2% gacha pasayganini ma'lum qilgan edi

O‘zbekistondagi banklar so‘mdagi depozitlar bo‘yicha foiz stavkalarini pasaytirdi. Bu haqdagi ma’lumot tijorat banklari ma’lumotlaridan kelib chiqdi.

Xususan, ikkita raqamli bank omonatlar bo‘yicha stavkalar pasaytirilganini rasman e’lon qildi. TBC Bank 1-apreldan boshlab to‘ldiriladigan muddatli omonatlar bo‘yicha yillik stavkalarni 23−24% dan 18,5−21% gacha, muddatli omonatlar bo‘yicha esa 25−26% dan 20,5−23% gacha pasaytirdi. Anorbank ham xuddi shu sanadan boshlab depozit stavkalarini pasaytiradi: Yuqori Daromad — 23% (26%), Ko‘rpacha — 22% (25%).

Omonat shartlari o‘zgarganini rasman e’lon qilgan banklar qatorida O‘zmilliybank, Agrobank, Asakabank, Ipoteka-bank, Mikrokreditbank va Kapitalbank ham bor.

Banklarning bu harakatlari, ayniqsa, 20-mart kuni Markaziy bank asosiy stavkani 14%gacha oshirgani sababli savollar tug‘dirmoqda. Bu qaror iqtisodiyotda pulning qadri oshishiga, ya’ni kreditlar va omonatlar bo‘yicha foiz stavkalarining ko‘tarilishiga olib kelishi kerak edi.

Markaziy bank ma’lumotlariga ko‘ra, fevral oyida so‘mdagi omonatlar bo‘yicha o‘rtacha stavka yillik 19,2% gacha pasaygan.

Nima uchun omonatlar bo‘yicha stavkalar pasaydi?

Bankers.uz nashrining bank sohasidagi manbalariga tayanib yozishicha, milliy valyutadagi omonatlar bo‘yicha stavkalarning sinxron pasayishi Markaziy bank “ko‘rsatmasi” bilan belgilangan. Gazeta.uz’ning bank sohasidagi manbalari ham bu regulyator ko‘rsatmasi bilan bog‘liqligini tasdiqlagan.

Iqtisodchi Otabek Bakirovning qayd etishicha, O‘zbekistonda banklar bir vaqtda va sinxron ravishda stavkalarni pasaytira boshlashi asosan “ma’muriy topshiriq, bosim yoki ta’sir” bo‘lgandagina yuz beradi, u buni “o‘tgan davrdan meros” deb atadi.

“Stavkalarning bozordagi talab/taklif, tarkibiy va konyunkturaviy o‘zgarishlarisiz sun’iy pasaytirilishi qanday oqibatlar yaratishini hammamiz ko‘rganmiz. Valyuta kursiga bosim ortishi, korrupsion kanallar paydo bo‘lishi, norasmiy tranzaksiyalarning kengayishi — bu to‘liq oqibatlar emas”, — deb yozadi u.

Bugunga qadar Markaziy bank omonatlar bilan bog‘liq vaziyatga rasman izoh bermadi.