O‘zbekistonda so‘m omonatlari bo‘yicha o‘rtacha stavka 17,4% gacha pasaydi

2026-yil aprel oyida O‘zbekistonda milliy valyutadagi omonatlar bo‘yicha o‘rtacha daromadlilik stavkasi 17,4% gacha pasayib, so‘nggi bir yildagi eng past ko‘rsatkichni qayd etdi. Bu haqda Markaziy bank matbuot xizmati ma’lum qildi.

Markaziy bank statistik ma’lumotlariga ko‘ra, mart oyiga nisbatan so‘mdagi omonatlar daromadliligi 0,7% bandga kamayib, yillik 17,4% ni tashkil etgan. Bir yilgacha bo‘lgan qisqa muddatli omonatlar bo‘yicha stavkalar 15% gacha tushgan. Bir yil va undan ortiq muddatga joylashtirilgan omonatlar esa o‘rtacha 18,1% daromad keltirmoqda.

Uzoq muddatli omonatlar bo‘yicha nominal daromadlilik pasaygan bo‘lsa-da, aholi uchun ularning real daromadliligi (kutilayotgan inflyatsiya hisobga olingan holda) 8,4% ni tashkil etgan.

Kapital.uz tahririyati tijorat banklarining amaldagi takliflarini o‘rganib, jismoniy shaxslar uchun so‘mdagi eng yuqori stavkali omonatlar ro‘yxatini tuzdi.

Korporativ segmentda ham o‘zgarishlar kuzatilgan. Korxonalar uchun so‘mdagi omonatlar bo‘yicha o‘rtacha daromadlilik 15% ni tashkil etdi. Eng yuqori stavkalarni TBC Bank (21% gacha), O‘zsanoatqurilishbank va Kapitalbank (19% gacha) taklif qilmoqda.

Xorijiy valyutadagi omonatlar segmentida esa tiklanish tendensiyasi kuzatilmoqda. Umumiy daromadlilik 4,1% gacha yetgan. Jismoniy shaxslar uchun valyutadagi omonatlar o‘rtacha 4,9% daromad keltirmoqda. AQSh dollaridagi eng yuqori stavkalar Garant bank, Anorbank va Universal Bank tomonidan taklif qilinib, yillik 8% gacha yetadi.

Biznes subyektlari uchun valyutadagi omonatlar bo‘yicha sharoitlar ham yaxshilanib, o‘rtacha daromadlilik 2,8% ni tashkil etdi. Ushbu yo‘nalishda MKBank (6,5% gacha) va O‘zsanoatqurilishbank (5% gacha) yetakchilik qilmoqda.