O‘zbekistonda o‘g‘it ishlab chiqarish bo‘yicha $2,8 mlrdlik 42 ta loyiha ishga tushirilishi rejalashtirilmoqda

2030-yilgacha mas’ul rahbarlar va hokimlar umumiy qiymati $2,8 mlrd bo‘lgan 42 ta yangi kimyo ishlab chiqarish korxonasini ishga tushirishni ta’minlashi kerak. Bu haqda prezident matbuot xizmati o‘tkazilgan yig‘ilish yakunlari bo‘yicha ma’lum qildi.

Agrosanoat uchun mo‘ljallangan mineral o‘g‘itlarga global talab har yili 5% ga oshib bormoqda. Kutilishicha, 2030-yilga borib ushbu bozorning jahon aylanmasi $260 mlrdlik chegaradan oshadi. Zamonaviy qishloq xo‘jaligi usullarining qo‘llanilishi suvda eruvchan tarkiblarga bo‘lgan ehtiyojning tez o‘sishiga olib kelmoqda.

42 ta loyihani ishga tushirish bo‘yicha belgilangan vazifaning bajarilishi 2030-yilgacha azotli moddalar ishlab chiqarishni 2,8 mln tonnadan 4 mln tonnagacha oshirish imkonini beradi. Fosforli qo‘shimchalar ishlab chiqarish hajmini 400 ming tonnadan 900 ming tonnagacha, suvda eruvchan o‘g‘itlar ishlab chiqarishni esa 100 ming tonnadan 400 ming tonnagacha yetkazish rejalashtirilgan.

Polimerlar va noorganik kimyo mahsulotlari ishlab chiqaruvchi zavodlarning ochilishi yangi kadrlarni jalb qilishni talab etadi. Tarmoqqa nanokimyo, “yashil” kimyo, supramolekulyar kimyo, shuningdek, sun’iy intellekt asosidagi kimyoviy modellashtirish sohalarida mutaxassislar kerak bo‘ladi. Shu munosabat bilan sohada ta’lim, ilmiy tadqiqotlar va startaplarni qo‘llab-quvvatlashning yagona tizimi yaratiladi.

Toshkent shahrining Mirzo Ulug‘bek tumanida 60 gektar maydonda ilmiy-ta’lim majmuasi barpo etiladi. Janubiy Koreya hamkorlari bilan birgalikda u yerda ixtisoslashgan innovatsiyalar markazi ochiladi. Mazkur markaz olimlarning tajriba-sinov ishlari xarajatlarining yarmini qoplab beradi.

Umuman olganda, qiymati $17 mlrd bo‘lgan 350 dan ortiq obyektni o‘z ichiga olgan keng ko‘lamli dasturni ishlab chiqishga kirishish topshirildi. Ushbu jarayonlarni samarali boshqarish maqsadida “O‘zkimyosanoat” aksiyadorlik jamiyatini transformatsiya qilish rejalashtirilmoqda.