Oʻzbekistonda norasmiy bandlik uchun jazolar kuchaytiriladi

Oʻzbekistonda ish beruvchilarning norasmiy bandlik uchun javobgarligini kuchaytirish rejalashtirilmoqda. Bu haqda 4-avgust kuni qabul qilingan prezident farmonida ma’lum qilindi.

Norasmiy bandlik bilan bogʻliq ilk huquqbuzarlik uchun 30 BHM (12,36 mln soʻm) miqdorida jarima, takroriy holatda esa 100 BHM (41,2 mln soʻm) jarima belgilangan.

Bandlik va kambagʻallikni qisqartirish vazirligi, Adliya vazirligi va Savdo-sanoat palatasiga avgust oyida Vazirlar Mahkamasiga qonun loyihasini taqdim etish topshirildi.

2026-yildan boshlab qurilish tashkilotlarining “Shaffof qurilish” platformasidagi reyting ballari bunday huquqbuzarliklar uchun pasaytiriladi. Ushbu mexanizmni amalga oshirish uchun Qurilish va uy-joy kommunal xoʻjaligi vazirligi, Raqamli rivojlanish vazirligi hamda Bandlik vazirligi mas’ul boʻladi.

Mart oyida Bandlik vazirligi Mehnat shartnomasini rasmiylashtirmasdan xodimlarni jalb etish uchun javobgarlikni nazarda tutuvchi Ma’muriy javobgarlik toʻgʻrisidagi kodeksning 49-moddasiga qoʻshimcha kiritish taklifini taqdim etgan edi.

Hujjatga koʻra, fuqarolarga 10 BHM, mansabdor shaxslarga esa 30 BHM miqdorida jarima belgilanishi, bir yil ichida takroriy huquqbuzarlik sodir etilganda jarima miqdori 200 BHM gacha oshirilishi koʻzda tutilgan.