NKMK birinchi yarim yillikda 60,8 trln so‘mlik mahsulot ishlab chiqardi

Navoiy kon-metallurgiya kombinati yanvar-iyun oylarida 60,8 trln so‘mlik mahsulot ishlab chiqardi, bu o‘tgan yilning shu davriga nisbatan 1,4% ko‘p.

Oltin ishlab chiqarish hajmi 1 537,6 ming troya unsiyasini tashkil etdi (2024-yilning birinchi yarmida 1 516,8 ming edi).

Investitsiya dasturi doirasida $219,5 mln o‘zlashtirildi va 1,19 mingta yangi ish o‘rni yaratildi. Xarajatlarni kamaytirish bo‘yicha chora-tadbirlar natijasida mahsulot tannarxi 1,8 trln so‘mga pasaytirildi.

Bundan tashqari, mahalliylashtirish dasturi doirasida 757,5 mlrd so‘mlik mahsulot ishlab chiqarildi. Tarmoqlararo sanoat hamkorligi bo‘yicha xaridlar hajmi 3,6 trln so‘mdan oshib ketdi.

May oyida NKMK London fond birjasida besh yillik muddatga va yillik 6,75% stavka bilan $500 mlnlik korporativ obligatsiyalarni joylashtirdi. AQSH, Yevropa va Osiyo investorlarining talabi $2,3 mlrddan oshib, bu chiqarilgan hajmdan 4,6 barobar ko‘p bo‘ldi.

2024-yilda O‘zbekistonning eng yirik oltin qazib oluvchi korxonasi daromadi $7,4 mlrdga yetdi. Oltin ishlab chiqarish hajmi esa 3,1 mln troya unsiyasini (96,4 tonna) tashkil etib, bu o‘tgan yilga nisbatan 5,4% ga ko‘p bo‘ldi. Bunday o‘sishga yangi ishlab chiqarish quvvatlarini ishga tushirish hisobiga erishildi.