“NKMK”ning sof foydasi yarim yilda $1,5 mlrddan oshdi

“Navoiy kon-metallurgiya kombinati” AJ 2025 yilning birinchi yarim yilligi yakunlari bo‘yicha $1,5 mlrddan ortiq sof foyda oldi. Bu ko‘rsatkich 2024 yilning shu davriga nisbatan qariyb ikki baravar ko‘p – o‘tgan yili daromad $882 mln bo‘lgan.

Hisobot davrida korxonaning sof tushumi 40% dan ko‘proqqa oshib, $4,7 mlrdni tashkil etdi. Yalpi foyda $2,9 mlrdga yetib, deyarli 59% o‘sdi. Operatsion foyda ham sezilarli darajada ko‘payib, $1,7 mlrddan $2,8 mlrdga ko‘tarildi. Davlat byudjetiga to‘langan soliqlar hajmi esa $716 mlndan $1,2 mlrdgacha ko‘paydi.

Bloomberg xabariga ko‘ra, hozirda “Navoiy KMK” London fond birjasi va mahalliy bozor orqali aksiyalarni birlamchi joylashtirish (IPO) jarayoniga tayyorlanmoqda. Dastlabki hisob-kitoblarga qaraganda, kompaniyaning umumiy qiymati, qarz majburiyatlari inobatga olinganda, qariyb $20 mlrdni tashkil qilishi mumkin.