Namangan aeroportida $140 mlnlik yangi terminal qurilmoqda

Prezident Shavkat Mirziyoyev bugun, 16-sentabr kuni hududlar rivoji va aholi hayoti bilan yaqindan tanishish maqsadida Namangan viloyatiga keldi.

Namangan aeroportida $140 mln investitsiya hisobiga yangi terminallar barpo etilmoqda. 3 qavatli qilib qurilayotgan yangi terminalda yo‘lovchi tashish quvvati 2,5 karra oshadi. Chegara nazorati va viza bo‘limlari, biznes zali, savdo va ovqatlanish shoxobchalari, tibbiyot xonasi, Duty free do‘konlari zamonaviy tashkil etiladi.

Shuningdek, aeroportda kuniga 50 tonna yuk tashish va 90 ta mamlakatga eksport qilish imkonini beruvchi yuk terminali ham qurilmoqda.

Masalan, bu yil Namangan viloyatiga 1,5 mln xorijiy va 2 mlndan ortiq mahalliy sayyohlarni jalb qilish, xizmatlar eksportini $210 mingga yetkazish rejalashtirilgan.

Aeroportda maxsus servis texnikalari ham yangilanadi. Bu turli hajmdagi samolyotlarni qabul qilish va ularga xizmat ko‘rsatish imkonini beradi. Shuningdek, keytering, yonilg‘i quyish majmuasi va boshqa xo‘jalik binolari quriladi. Yangi terminallar kelgusi yil ishga tushirilishi ko‘zda tutilgan.