O‘zbekistonda muammoli kreditlar hajmi 21 trln so‘mdan oshdi

2025-yil 1-yanvar holatiga O‘zbekiston banklarida muammoli kreditlarning (NPL) umumiy hajmi 21,1 trln so‘mni tashkil etib, kredit portfeli umumiy hajmining 4% ini tashkil etdi. Bu haqda Markaziy bank xabar berdi.

Davlat banklarida bunday kreditlar ulushi 4,1% dan 3,9% gacha, xususiy banklarda esa 4,6% dan 4,1% gacha pasaygan. Davlat banklarida muammoli kreditlar miqdori 14,3 trln so‘mni tashkil etdi.

NPLning eng yuqori darajasi “Biznesni rivojlantirish banki”da qayd etilgan – 8,5%, undan keyin “Agrobank” 4,9% va “Mikrokreditbank” 4,6% bilan. Xususiy banklarda muammoli kreditlarning eng yuqori foizi “Madad Invest Bank”da – 24,1%, undan keyin “Garant Bank” 14,8%, uchinchi o‘rinda esa “AVO Bank” 12,5% bilan kelmoqda.

Kredit portfelining umumiy hajmi dekabr oyidagi 525,8 trln so‘mdan 1-yanvar holatiga 533,1 trln so‘mga oshdi. Ushbu mablag‘larning 366,7 trln so‘mi davlat banklari kreditlari, 166,3 trln so‘mi esa xususiy banklar kreditlari hissasiga to‘g‘ri keladi.