Xitoy kompaniyasi Namanganda misni qayta ishlash zavodini qurmoqchi

Xitoyning “Boi Yi da” kompaniyasi Namangan misni qayta ishlash zavodini qurish loyihasiga qiziqish bildirdi. Bu haqda Namangan viloyati matbuot xizmati xabar bermoqda.

Loyihani amalga oshirish ikki bosqichda bo’ladi, birinchi bosqich esa taxminan $40 mln sarmoya talab qiladi va zavod mahsulotlari eksportga yo’naltiriladi.

Uchrashuv davomida Namangan viloyati hokimi Shavkatjon Abdurazakov Namangan shahrida mavjud imkoniyatlar haqida gapirib, loyihani muvaffaqiyatli amalga oshirish uchun zarur shart-sharoitlar yaratilishiga ishontirdi. Hozirda xitoylik tadbirkorlar zavod qurish uchun potentsial uchastkalarni tekshirmoqda.

Eslatib o’tamiz, Xitoyning “Shandong Aipurui Steel Plate Co., Ltd” Farg’ona viloyatidagi “Taraqqiyot” sanoat zonasida $120 mlndan ortiq metallga ishlov berish zavodini quradi.