Milliy turizm platformasi Booking va Agoda bilan integratsiya qilinadi

O‘zbekistonda Milliy turizm yagona platformasini xalqaro bronlash servislarining yirik agregatorlari — Booking, Agoda va Traveloka bilan integratsiya qilish rejalashtirilmoqda. Bu Vazirlar Mahkamasining “Umra plyus” dasturini amalga oshirishga doir qarorida belgilangan.

Hujjatga muvofiq, 2026-yil yanvar oyida platforma bazasida “Ziyorat-turizm” nomli maxsus modul ishga tushiriladi. 2026-yil fevral oyida esa platformaning texnik imkoniyatlari kengaytirilib, u Booking, Agoda va Traveloka tizimlari bilan bog‘lanadi.

Rivojlanish rejasiga ko‘ra, 2026–2027-yillarda Milliy turizm platformasi xizmatlari Malayziya turizm bozorida faol targ‘ib qilinadi. Shu bilan birga, muzeylar va me’moriy yodgorliklarni raqamlashtirish ishlari amalga oshiriladi. Natijada tashrif buyuruvchilar madaniy obyektlarga kirish chiptalarini onlayn tarzda xarid qilish imkoniyatiga ega bo‘ladi.

Mazkur yo‘nalishni amalga oshirish va qo‘llab-quvvatlash vazifalari 2026-yildan boshlab Madaniy meros agentmasiga yuklatiladi. Hukumat tomonidan yagona axborot tizimini yaratish to‘g‘risidagi qaror 2024-yil dekabr oyida qabul qilingan bo‘lib, loyihaning asosiy funksional vazifalari 2025-yil noyabr oyida Prezident hujjati bilan belgilangan.

Avval xabar qilinganidek, “Umra plyus” dasturi doirasida Malayziya va Indoneziyadan keladigan har bir sayyoh uchun turoperatorlarga $100 miqdorida subsidiya ajratiladi. Dastur orqali jami 100 ming nafar ziyoratchini jalb etish rejalashtirilgan.