O‘zbekiston meva-sabzavot eksportidan $2,1 mlrddan ortiq daromad oldi

Davlat statistika qo‘mitasi ma’lumotlariga ko‘ra, 2025-yil yakunida O‘zbekiston $2,1 mlrddan ortiq qiymatga ega bo‘lgan 2,1 mln tonnadan ziyod meva va sabzavot mahsulotlarini eksport qildi.

O‘tgan yilga nisbatan eksport hajmi jismoniy ko‘rsatkichlarda 6,2% ga oshgan bo‘lsa, pul ifodasidagi o‘sish 36,9% ni tashkil etdi. Bu eksport tarkibida yuqori qo‘shilgan qiymatga ega mahsulotlar ulushi oshganidan dalolat beradi.

Hisobotga ko‘ra, meva-sabzavot mahsulotlari mamlakat umumiy eksportining 6,3% ini tashkil qilgan. Eksport tarkibida mevalar, sabzavotlar, dukkaklilar, quritilgan va qayta ishlangan mahsulotlar muhim o‘rin egallagan.

Mutaxassislar eksportdan tushgan daromadning keskin oshishini tashqi bozorlarda o‘zbek mahsulotlariga talab kuchaygani, logistika yo‘nalishlari kengaygani hamda mahsulotlarni saqlash va qayta ishlash infratuzilmasi yaxshilangani bilan izohlamoqda.

Qayd etilishicha, Rossiya, Xitoy, Qozog‘iston, Afg‘oniston va Yevropa mamlakatlari o‘zbek meva-sabzavotlari uchun asosiy eksport bozorlaridan biri bo‘lib qolmoqda.