Yil yakuniga qadar “Toshkent metropoliteni” barcha bekatlarida 200 ta infokiosklar o‘rnatiladi

Avvalroq “Toshkent metropoliteni” davlat unitar korxonasi yo‘lovchilar tomonidan bir martalik chiptalarga bo‘lgan talab keskin kamayib ketgani sababli 13 ta bekatdagi metro kassalari yopilishini va kassa operatorlari ishdan bo‘shatilishi haqida ma’lum qilgandi.

28-avgust kuni berilgan metropoliten matbuot xizmati xabariga ko‘ra, birinchi bosqichda 204 ta kassa operatori lavozim shtatlari qisqartirilgan. Yil oxiriga qadar barcha kassalar va kassa operatorlari faoliyati tugatilib, avtomatlashtirilgan bankomatlar qo‘yilishi rejalashtirilgan.

Ijtimoiy tarmoqlarda “Metroda kassa xodimlari yoppasiga ishdan bo‘shatiladi” sarlavhasi ostidagi xabar tarqalgani yuzasidan “Toshkent metropoliteni” DUK vaziyatga munosabat bildirdi.

Jumladan, metropolitenning 23 bekatida yo‘l haqini naqd pulda to‘lovni amalga oshirmoqchi bo‘lgan fuqarolarga 24 ta QR-kodli chipta chiqarib beruvchi infokiosklar o‘rnatilgan. Bir marotabalik QR-kodli chiptaning narxi metropoliten kassalarida ham, infokiosklarda ham 3 ming so‘m etib belgilangan.

Agar yo‘lovchi tomonidan 5 ming, 10 ming yoki undan yuqori bo‘lgan kupyuralar kiritilganda, qolgan mablag‘ fuqaroning mobil raqamining hisob raqamiga qaytim sifatida tashlab beriladi.

Bundan tashqari, ATTO kompaniyasi tomonidan jamoat transportlarida hamda Toshkent metropoliteni bekatlarida  quyidagi to‘lov tizimlari joriy etilgan:

• ATTO transport kartalari;
• Uzcard Duo hamda Humo bank kartalari;
• Visa va MasterCard xalqaro bank kartalari;
• Virtual transport kartalari;
• mobil ilovalar orqali QR to‘lovlar;
• FacePay to‘lov tizimi;
• PalmPay to‘lov tizimi.

Yil yakuniga qadar metropolitenning barcha bekatlariga 200 ta infokiosklar o‘rnatilishi rejalashtirilgan.

Shuningdek, qisqarishga tushgan xodimlar uchun belgilangan tartibda to‘rt oylik lavozim ish haqi miqdorida kompensatsiya va nafaqalar to‘lab beriladi. Ularni kelgusida ish bilan ta’minlash maqsadida buxgalteriya, tikuvchilik, qandolatchilik kabi yo‘nalishlardagi kurslarida o‘qishi uchun xarajatlar “Toshkent metropoliteni” DUK tomonidan to‘lab beriladi.

Yuqoridagilardan kelib chiqib OAV vakillaridan asoslanmagan va yolg‘on ma’lumotlarni tarqatmaslikni so‘rab qolamiz. Hamda buning uchun Ma’muriy javobgarlik to‘g‘risidagi kodeksning 202²-moddasi “Yolg‘on axborot tarqatish”, shuningdek, Jinoiy kodeksning 244⁶-moddasi “Yolg‘on axborot tarqatish” bo‘yicha javobgarlik mavjudligini eslatib o‘tamiz, deyiladi xabar yakunida.