O‘zbekistonda metan zapravkalari faoliyati vaqtincha cheklandi

O‘zbekistonda metan gaz quyish shoxobchalari faoliyati vaqtincha cheklab qo‘yildi. Bu haqda O‘zbekiston Energetika vazirligi matbuot xizmati xabar berdi.

Ma’lum qilinishicha, mamlakat hududiga sovuq va nam havo massalari kirib kelgani sabab tabiiy gaz iste’moli keskin oshgan. Natijada magistral gaz quvurlarida bosim pasaygani qayd etilgan.

Shu sababli aholi uy-joylari va ijtimoiy soha obyektlarini tabiiy gaz bilan uzluksiz ta’minlash ustuvor vazifa sifatida belgilangan. Shu munosabat bilan avtomobillarga gaz to‘ldirish kompressor stansiyalari (AGNKSh) faoliyati 2026-yil 4-mart kuni soat 19:00 dan 5-mart kuni soat 10:00 gacha vaqtincha to‘xtatiladi.

Qayd etilishicha, mazkur choralar gaz transport tizimi barqaror ishlashini ta’minlashga qaratilgan. Bunda cheklovlar jamoat transporti hamda ijtimoiy muassasalarga xizmat ko‘rsatuvchi transport vositalariga tatbiq etilmaydi — ular uchun gaz yetkazib berish odatdagi tartibda davom etadi.