2-fevraldan metan zapravkalariga qo’yilgan cheklovlar yumshatiladi

2-fevraldan boshlab O‘zbekistonning qator hududlaridagi metan zapravkalar soat 10:00 dan 16:00 gacha faoliyat yuritadi, deya xabar bermoqda Energetika vazirligi.

Farg‘ona vodiysida avtomobillarga gaz to‘ldirish kompressor shoxobchalarining (metan zapravkalar) ish vaqti hokimliklar bilan kelishilgan holda, gaz bosimidan kelib chiqib belgilanadi.

Ijtimoiy soha obyektlariga xizmat ko‘rsatuvchi maxsus texnika va jamoat transportlari uchun gaz ta’minoti cheklovlarsiz, barqaror tarzda ta’minlanadi, — deyiladi xabarda.

Eslatib o‘tamiz, 20-yanvardan boshlab respublikada metan zapravkalari faoliyatiga cheklovlar kiritilgandi. Energetika vazirligining ma’lum qilishicha, bu havo haroratining pasayishi bilan bog‘liq. Toshkentda ular bir kun oldin yopilgan. Propan zapravkalari esa ishlayotgandi.