O‘zbekiston Markaziy banki 2025-yil sentabrgacha antifrod tizimini joriy etadi

2025-yil 30-aprelda prezidentning “Axborot texnologiyalaridan foydalanib sodir etiladigan jinoyatlarga qarshi kurashishni yanada kuchaytirish chora-tadbirlari to‘g‘risida”gi farmoni qabul qilindi. Bu haqda Adliya vazirligi xabar bermoqda.

Hujjatga ko‘ra, Ichki ishlar vazirligi O‘zbekistonda kiberjinoyatchilikka qarshi kurashish bo‘yicha vakolatli organ etib belgilandi.

Banklar, to‘lov tizimlari operatorlari va to‘lov tashkilotlariga kundalik faoliyatda mijozlar manfaatlari va ularning moliyaviy xavfsizligini ustuvor himoya qilishni ta’minlash topshirildi.

Bundan tashqari, kiberjinoyatlarni sodir etishda o‘zida rasmiylashtirilgan bank kartalari, hisobvaraqlar, SIM-kartalar yoki elektron hamyonlardan foydalanishga yo‘l qo‘ygan shaxslarga nisbatan ma’muriy va jinoiy javobgarlik belgilanmoqda.

Shuningdek, kiberjinoyat natijasida yetkazilgan moddiy zararni, agar bu ular tomonidan axborot va kiberxavfsizlik talablariga rioya etilmaganligi tufayli yuzaga kelgan bo‘lsa, tashkilotlar hisobidan qoplash tartibi joriy etilmoqda.

Bundan tashqari, pul va mol-mulkni noqonuniy jalb qilganlik uchun jazo choralari kuchaytirilmoqda. Jinoyat sodir etishda axborot texnologiyalaridan foydalanish jazoni og‘irlashtiruvchi holat sifatida baholanadi va og‘irroq jazoga sabab bo‘ladi.

Markaziy bank aholi mablag‘larini jalb qilishga qaratilgan firibgarlik sxemalarini tezkor aniqlash va huquqni muhofaza qiluvchi organlarni xabardor qilish tizimini joriy etadi. Xabardorlikni oshirish maqsadida internet va ijtimoiy tarmoqlardan maqsadli reklama orqali kiberjinoyatlarni sodir etish usullari to‘g‘risida ogohlantirishlarni tarqatish uchun foydalaniladi.

2025 yil 1 sentyabrga qadar Markaziy bank tranzaksiyalar to‘g‘risidagi ma’lumotlarni integratsiya qilish va markazlashtirilgan antifrod tizimini yaratish, banklar va to‘lov tashkilotlarida antifrod tizimlarini joriy etishni ta’minlashni rejalashtirmoqda.