2025-yilda 10 mln so‘mgacha bo‘lgan P2P o‘tkazmalari hajmi 70% dan oshgan

2025-yilda O‘zbekistonda jismoniy shaxslar o‘rtasidagi pul o‘tkazmalarining katta qismi kichik summalarda bajarilgan. Bu haqda Markaziy bank matbuot xizmati ma’lum qildi.

Tahlillarga ko‘ra, 10 mln so‘mgacha bo‘lgan P2P o‘tkazmalar umumiy operatsiyalarning 71,5% ini tashkil etgan. Shundan 46,1% o‘tkazmalar 1 mln so‘mgacha bo‘lgan summalarga to‘g‘ri keladi. 1 mln so‘mdan 5 mln so‘mgacha bo‘lgan operatsiyalar ulushi 16,8%, 5 mln so‘mdan 10 mln so‘mgacha bo‘lgan o‘tkazmalar esa 8,6% ni tashkil etgan.

Yirik summadagi o‘tkazmalar ancha kam uchragan. 50 mln so‘mdan yuqori operatsiyalar umumiy hajmning birozdan ortiq 5% ini tashkil etgan bo‘lsa, 200 mln so‘mdan oshgan o‘tkazmalar ulushi atigi 1,4% darajasida bo‘lgan.

Avvalroq Markaziy bank O‘zbekistonda to‘lov terminallari orqali amalga oshirilgan naqdsiz operatsiyalar hajmi 460 trln so‘mga yetganini ham ma’lum qilgan edi.