O‘zbekistonda muammoli kreditlar hajmi 24,3 trln so‘mdan oshdi

2025-yil 1-mart holatiga O‘zbekiston banklarida muammoli kreditlarning (NPL) umumiy hajmi 24,3 trln so‘mni tashkil etib, kredit portfeli umumiy hajmining 4,5% ini tashkil etdi. Bu haqda Markaziy bank xabar berdi.

Davlat banklarida bunday kreditlar ulushi o‘tgan oydagidek 4,6% ligacha qolgan bo‘lsa, xususiy banklarda esa 4,2% dan 4,3% gacha oshgan. 

Davlat banklarida muammoli kreditlar miqdori 17,01 trln so‘mni tashkil etdi. Ularda NPLning eng yuqori darajasi “Biznesni rivojlantirish banki”da qayd etilgan — 9,0%, undan keyingi o‘rinlarni “Mikrokreditbank” 6,9%, “Agrobank” va “Asaka bank” 4,7% bilan egallagan. 

Xususiy banklarda muammoli kreditlarning eng yuqori foizi “Garant Bank”da 21,7%, undan keyin “AVO Bank” 12,9%, uchinchi o‘rinda esa “Madad Invest Bank”da — 11,0% bilan kelmoqda.

Kredit portfelining umumiy hajmi fevral oyidagi 533,989 trln so‘mdan 1-martda 540,022 trln so‘mga oshdi. Ushbu mablag‘larning 370,6 trln so‘mi davlat banklari kreditlari, 169,3 trln so‘mi esa xususiy banklar kreditlari hissasiga to‘g‘ri keladi.