“Leapmotor” O‘zbekistonda o‘z avtomobillarini qayta sinovdan o‘tkazishni rejalashtirmoqda

Texnik jihatdan tartibga solish sohasidagi nazorat inspeksiyasi tomonidan “Leapmotor” kompaniyasiga qo‘yilgan cheklovlar bo‘yicha muzokaralar davom etmoqda. Bu haqda nazorat inspeksiyasi matbuot xizmati ma’lum qildi.

Ilgari O‘zbekistonda “Leapmotor” avtomobillarini sertifikatlash to‘xtatib qo‘yilgan edi. Xitoyning Leapmotor C16 rusumli avtomobilini sinash jarayonida xalqaro standartlarga, jumladan, BMT belgilagan xavfsizlik talablariga nomuvofiqlik aniqlandi. Ruxsat etilgan me’yorlardan 16 barobar oshib ketganligi qayd etildi.

Davlat ilmiy-sinov va sifat nazorati markazi (O‘ZAK.SL.0309) tomonidan 2025-yil 10-martda tuzilgan SB-0309-388/25-sonli sinov bayonnomasiga ko‘ra, mazkur avtomobil tashqi elektromagnit nurlanishga chidamliligi bo‘yicha UzTR.237-016:2017 standartiga (3-ilova, 44-band) mos kelmaydi.

Yaqin kunlarda kompaniya mutaxassislarining O‘zbekistonga tashrifi kutilmoqda, uning doirasida ular ishtirokida takroriy sinovlar o‘tkazilishi rejalashtirilgan. Sinovlar kompaniya ekspertlari ishtirokini hisobga olgan holda tashkil etiladi.