Larri Ellison Bloomberg talqini bo‘yicha eng boylar ro‘yxatida Maskni ortda qoldirdi

Oracle aksiyalarining keskin o‘sishi natijasida, kompaniyaning 81 yoshli hammuassisi Larri Ellison Bloomberg reytingi bo‘yicha dunyoning eng boy insonlari ro‘yxatida birinchi marta yetakchilikni qo‘lga kiritdi.

Uning boyligi $393 mlrdga baholanmoqda, Ilon Maskning boyligi esa $385 mlrdga teng. Bu o‘sish Oracle aksiyalarining qiymati 10-sentabr kuni savdolar boshida 40% ga ko‘tarilishi tufayli yuz berdi, natijada Ellisonning kapitali bir kunda taxminan $100 mlrdga oshdi — bu rekord darajadagi o‘sish hisoblanadi.

Biroq, Forbes jurnali Maskning boyligini $463 mlrdga baholaydi, bunda nafaqat uning Tesla’dagi ulushini, balki SpaceX va xAI kabi nodavlat kompaniyalardagi ulushlarini ham hisobga oladi. Bu usulga ko‘ra Mask yetakchilikni saqlab qolmoqda.

Oracle qiymatining keskin oshishi uning bulutli xizmatlar sohasidagi yutuqlari bilan bog‘liq. So‘nggi chorakda bulutli infratuzilmadan olingan daromad 55% ga oshib, $3,3 mlrdni tashkil etdi. Kompaniya 2025-moliyaviy yilda bu ko‘rsatkich 77% ga oshib, $18 mlrdga, 2030-yilga kelib esa $144 mlrdga yetishini prognoz qilmoqda.