O‘zbekistonda kreativ xizmatlar eksporti 2030-yilgacha $1 mlrddan oshiriladi

O‘zbekistonda kreativ iqtisodiyot 2030-yilgacha YAIMning 5% iga yetkaziladi. Bu haqda prezidentning tegishli qarori imzolandi. Bu 145 trln so‘m hajmni anglatadi.

Shuningdek, kreativ industriya mahsulotlari va xizmatlari eksporti $1 mlrddan oshiriladi. Sohada amalga oshirilayotgan loyihalar doirasida 500 mingta yangi ish o‘rni yaratish rejalashtirilgan.

Hujjatda 2026 – 2027-yillarda Kreativ industriya parki infratuzilmasini bosqichma-bosqich tashkil etish nazarda tutilgan. Birinchi bosqichda loyiha davlat-xususiy sheriklik asosida amalga oshiriladi.

Park hududida sayr qilish va hordiq chiqarish uchun yashil bog‘ barpo etiladi. Unda art-obyektlar va monumental san’at asarlari joylashtiriladi. Shuningdek, raqamli dizayn va dasturlash yo‘nalishida nufuzli xalqaro maktab faoliyati yo‘lga qo‘yiladi.

Loyiha doirasida buk-kafe, sport va workout maydonchalari, mehmonxona ham tashkil etiladi. Bundan tashqari, badiiy ijodkorlar pavilyoni, kreativ ustaxonalar, ekologik ofis xonalari va kovorking markazi barpo etilishi ko‘zda tutilgan.