O’zbekiston va Janubiy Koreya parvozlar sonini qariyb 2,5 barobarga oshiradi

O’zbekiston va Janubiy Koreya o’zaro anglashuv memorandumini imzoladilar. Bu haqda transport vazirligi xabar bermoqda.

Unga ko’ra, ikki mamlakat o’rtasida parvoz qilish uchun tayinlangan aviakompaniyalar soniga cheklovlar olib tashlandi.

Shuningdek, har tomon uchun haftasiga belgilangan reyslar soni 10 tadan 24 gacha ko’paytirildi, bu esa mamlakatlar o’rtasida haftasiga 48 tagacha reyslarni amalga oshirishga imkon beradi.

Bundan tashqari, Toshkent va Seul o’rtasida haftasiga 12 ta reysni va Janubiy Koreya mintaqalaridan Toshkentga haftasiga to’rttagacha reyslarni amalga oshirishga ruxsat berilgan.

Ikkala davlatga ham O’zbekiston mintaqalaridan Seulga va ikki mamlakatning mintaqaviy hududlari o’rtasida haftasiga to’rttagacha reyslarni amalga oshirish huquqi berildi.

Bundan tashqari, Jeju va Samarqand xalqaro aeroportlarida “ochiq osmon” rejimi joriy etildi, bu esa har ikki tomonning aviakompaniyalariga havo qatnovini osonlashtiradi.