O‘zbekistonda ko‘chmas mulk savdosi 13,2% ga oshdi

Iqtisodiy tadqiqotlar va islohotlar markazi 2025-yil noyabr oyi yakunlari bo‘yicha O‘zbekiston ko‘chmas mulk bozoridagi o‘zgarishlarni tahlil qildi. Bu haqda tashkilot matbuot xizmati xabar berdi.

Ma’lumotlarga ko‘ra, mamlakatda iste’mol faolligi sezilarli darajada oshgan. Eng yuqori savdo o‘sish sur’atlari Buxoro viloyatida — 35,4%, Qashqadaryo viloyatida — 26,5% va Samarqand viloyatida — 21,7% qayd etildi. Respublika bo‘yicha barcha bitimlarning qariyb 30%i Toshkent shahri hissasiga to‘g‘ri kelgan bo‘lib, poytaxtda uy-joy oldi-sotdi hajmi 8,8% ga oshgan.

Ikkilamchi bozorda ko‘chmas mulklarning o‘rtacha narxi yillik hisobda 7% ga ko‘tarildi. Eng jadal narx o‘sishi Surxondaryo, Jizzax va Namangan viloyatlarida kuzatilib, o‘rtacha 17% ni tashkil etdi.

Toshkent shahrida esa vaziyat uy-joy turiga qarab farqlanadi. Ikkilamchi bozordagi ko‘chmas mulk narxlari 0,9% ga pasaygan, xususan Mirzo Ulug‘bek va Yashnobod tumanlarida tushish 5% atrofida bo‘lgan. Shu bilan birga, poytaxtda yangi qurilgan uylar narxi 4% ga oshgan, Yakkasaroy, Mirobod va Mirzo Ulug‘bek tumanlarida esa birlamchi uy-joylar 9% gacha qimmatlashgan.

Toshkentda ijara narxlari kvadrat metri uchun o‘rtacha $8,7 ni tashkil etib, bu o‘tgan yilga nisbatan 5% ga yuqori. Eng yuqori ijara stavkalari Shayxontohur, Mirobod va Yakkasaroy tumanlarida — $11 darajasida saqlanib qolmoqda. Mirzo Ulug‘bek va Bektemir tumanlarida esa ijara narxlari o‘sish sur’atlari 8% gacha tezlashgan.