Jizzax viloyatida ikkita atom elektr stansiyasi qurilishi boshlanadi

O‘zbekiston hukumati Jizzax viloyatida yirik va kichik atom elektr stansiyalari qurishga qaror qildi. Bu haqda Bosh vazir o‘rinbosari Jamshid Xo‘jayev Moskvada o‘tkazilgan Global atom forumida ma’lum qildi.

Loyiha Rossiyaning “Rosatom” davlat korporatsiyasi bilan hamkorlikda amalga oshiriladi. Bir maydonda ikkita yirik quvvatli (har biri 1000 MVt) va ikkita kichik quvvatli (har biri 55 MVt) reaktor qurilishi rejalashtirilgan. Umumiy quvvat 2,1 GVtni tashkil etadi.

Kutilishicha, 2035-yilga kelib mazkur stansiyalar yiliga 15 mlrd kilovatt-soatdan ortiq elektr energiyasi ishlab chiqaradi. Bu mamlakatda toza energiya ulushini 40% dan yuqoriga yetkazish maqsadiga sezilarli hissa qo‘shadi.

“Rosatom” agentligi direktori Azim Axmedxodjayevning aytishicha, maydonda allaqachon yer ishlari boshlangan. Loyiha xavfsizlikning barcha xalqaro standartlariga muvofiqligini ta’minlash uchun Xalqaro atom energiyasi agentligi (MAGATE) bilan hamkorlikda ishlab chiqilmoqda. Shuningdek, u O‘zbekiston kichik modul reaktorlarini joriy etish orqali atom energetikasi sohasida tajriba almashish va kadrlar tayyorlash markaziga aylanishi mumkinligini qayd etdi.