Shavkat Mirziyoyev biznesga bosim o‘tkazayotgan jinoiy tuzilmalarni tugatishni topshirdi

Shavkat Mirziyoyev parlament va xalqga murojaatida biznesga bosim o‘tkazayotgan jinoiy tuzilmalarni butunlay yo‘q qilish zarurligini ta’kidladi hamda keng ko‘lamli antikorrupsiya choralarini e’lon qildi. Bu haqda Prezident matbuot xizmati xabar berdi.

Davlat rahbari nutqida qonundan ustun bo‘lishga urinayotgan, tadbirkorlarning aktivlarini egallashga harakat qilayotgan jinoiy guruhlar faolligi oshayotganini qayd etdi. Prezidentning ta’kidlashicha, bunday tuzilmalarga ayrim sportchilar ham jalb etilmoqda, ayrim guruhlar esa respublika tashqarisida faoliyat yuritib, O‘zbekistonning xalqaro obro‘siga putur yetkazmoqda.

Shavkat Mirziyoyev huquqni muhofaza qiluvchi organlarda bunday jinoiy tuzilmalar faoliyatiga barham berish va investorlarni himoya qilish uchun yetarli resurslar mavjudligini ta’kidladi.

Shuningdek, korrupsiyaga qarshi kurash masalasiga alohida e’tibor qaratildi. Prezident korrupsiyani mamlakat taraqqiyotiga eng katta tahdid deb atadi va 2026-yildan ushbu sohada “favqulodda holat” rejimi joriy etilishini ma’lum qildi. Nazoratni kuchaytirish maqsadida barcha vazirliklar, idoralar va hokimliklarda komplayens va ichki audit uchun mas’ul bo‘lgan rahbar o‘rinbosarlari lavozimlari joriy etiladi. Nazorat jarayonlariga Hisob palatasi vakillari ham jalb qilinadi.

Mazkur mas’ullar insofsiz xodimlarni aniqlash, byudjet mablag‘larining talon-toroj qilinishini oldini olish bilan shug‘ullanadi va bevosita prezidentga hisobot beradi. Tekshiruvlar barcha tuzilmalarni, jumladan, kuch tuzilmalari, soliq va bojxona xizmatlari, banklar hamda yirik davlat kompaniyalarini qamrab oladi. Komplayens xizmatlari faoliyatiga to‘sqinlik qilgan shaxslar jinoyatga sherik sifatida javobgarlikka tortiladi.