O‘zbekiston va JBIC $10 mlrddan ortiq loyihalarni amalga oshiradi

Shavkat Mirziyoyev Tokiodagi rasmiy tashrifi doirasida Yaponiya Xalqaro hamkorlik banki (JBIC) rahbari Nobumitsu Xayasi bilan uchrashuv o‘tkazib, yangi investitsiya dasturlarini muhokama qildi. Bu haqda Prezident matbuot xizmati xabar berdi.

Hozirga qadar JBIC bilan hamkorlikda amalga oshirilayotgan qo‘shma tashabbuslar hajmi $5 mlrddan oshgan. Ushbu mablag‘lar neft-kimyo sanoati, energetika majmuasi, telekommunikatsiyalar va yengil sanoat yo‘nalishlariga yo‘naltirilgan.

Tomonlar $10 mlrddan ortiq qiymatga ega yangi hamkorlik yo‘nalishlarini tayyorlashga kelishib oldi. Ustuvor sohalar qatorida transport tizimini modernizatsiya qilish, IT tarmoqlarini rivojlantirish hamda sog‘liqni saqlash tizimining moddiy-texnik bazasini yangilash belgilandi.

Shuningdek, davlat-xususiy sheriklik asosida ijtimoiy loyihalarga sarmoya jalb etish va xususiy biznesni qo‘llab-quvvatlash masalalariga alohida e’tibor qaratildi. JBIC rahbari Nobumitsu Xayasi bank O‘zbekistonda amalga oshirilayotgan islohotlarni qo‘llab-quvvatlashga tayyor ekanini tasdiqladi.

Eslatib o‘tamiz, O‘zbekistonda yapon standartlari asosida, sun’iy intellektdan foydalangan holda maxsus iqtisodiy zona ishga tushirilishi rejalashtirilgan. Sanoat maydonlarini avtomatlashtirishga JICA agentligi jalb etiladi. Bu tashabbuslar mamlakatning 2030 yilga borib daromadi o‘rtachadan yuqori bo‘lgan davlatlar qatoriga kirish maqsadiga xizmat qiladi.