Jahon banki islohotlarni qo’llab-quvvatlash uchun O’zbekistonga $800 mln ajratadi

Jahon banki O’zbekistondagi islohotlarni qo’llab-quvvatlash uchun imtiyozli kreditlar shaklida $800 mlnlik moliyaviy paketni taqdim etadi. Bu haqda bank matbuot xizmati xabar bermoqda.

Ushbu islohotlar inklyuziv va barqaror bozor iqtisodiyotiga o’tishni tezlashtirishga qaratilgan. Jahon banki tomonidan qo’llab-quvvatlanadigan islohotlar dasturi ishbilarmonlik muhitini yaxshilash, qishloq xo’jaligi, temir yo’l va energetika sohalarida samaradorlikni oshirish, davlat moliyasini boshqarishni takomillashtirish, ijtimoiy himoyadan foydalanish imkoniyatlarini kengaytirish va ekologik va iqlim xatarlariga tayyorlikni oshirishni o’z ichiga oladi.

Mablag’lar past foiz stavkalari va uzoq muddatlarga ega bo’lgan kreditlar shaklida ajratiladi, bu esa O’zbekistonga mablag’larni tejash va muhim ijtimoiy-iqtisodiy ehtiyojlarga yo’naltirish imkonini beradi. 

Moliyalashtirish hukumatga bir qator muhim sohalarda aniq natijalarga erishishga yordam beradi, masalan: 

• ijtimoiy himoya;
• gender zo’ravonligiga qarshi kurash;
• fermerlarning huquqlarini himoya qilish;
• ishbilarmonlik muhitini yaxshilash;
• davlat moliyasini boshqarish;
• iqlim o’zgarishiga qarshi kurash;
• suv resurslarini boshqarish;
• atrof-muhitga ta’sirni baholash;
• iqlim o’zgarishiga chidamli investitsiyalar;
• temir yo’l sanoati;
• energiya.