Abdulahad Qo‘chqorov IT Park Uzbekistan’ning yangi direktori etib tayinlandi

Abdulahad Qo‘chqorov IT Park Uzbekistan bosh direktori lavozimini egalladi. Texnoparkni 2017-yildan buyon Farhod Ibragimov boshqarib kelgan.

Farhod Ibragimov joriy yilning fevral oyidan buyon IT Park’ning Kuzatuv kengashi raisi sifatida faoliyat yuritmoqda. U texnopark ekotizimining strategik rivojlanishi va yangi Enterprise Uzbekistan tashabbusining ishga tushirilishi uchun mas’ul bo‘ladi.

Abdulahad Qo‘chqorov IT Park jamoasiga 2019-yilda qo‘shilgan. Dastlab u operatsion direktor sifatida ish boshlagan, keyinchalik ijrochi direktor lavozimiga tayinlangan. IT Park’dagi faoliyatidan avval u Groundzero kovorking tarmoqlarini boshqargan va O‘zbekiston–Yaponiya markazida biznes kurslarini muvofiqlashtirgan.

Hozirda u Vazirlar Mahkamasi huzuridagi Biznes va tadbirkorlik oliy maktabida magistratura bosqichida tahsil olmoqda. Shuningdek, Khan Academy Uzbek loyihasini mahalliylashtirish bilan shug‘ullanayotgan direktorlar kengashi a’zosi hisoblanadi.