2026-yildan boshlab issiqxona xo‘jaliklariga ijtimoiy soliq stavkasi 1% etib belgilanadi

O‘zbekiston prezidenti 8-oktabr kuni issiqxona xo‘jaliklari faoliyati samaradorligini oshirish va eksport hajmini ko‘paytirish chora-tadbirlari to‘g‘risidagi farmonni imzoladi.

Hujjatda 2025−2027-yillarda meva-sabzavot va oziq-ovqat mahsulotlari eksporti hajmini oshirish va issiqxona xo‘jaliklarini rivojlantirish bo‘yicha vazifalar belgilangan:

• eksport hajmini 2026-yilda $3,5 mlrdga va 2027-yilda 4 mlrdga yetkazish;
• tabiiy gaz bilan kafolatlangan issiqxonalarda meva-sabzavot yetishtirish hajmini 2026-yilda 620 ming tonnaga, 2027-yilda esa 670 ming tonnaga yetkazish, eksport qilinadigan mahsulotlar ulushini 30% dan 70% ga oshirish;
• 2026-yilda 20 ming gektar va 2027-yilda 15 ming gektar maydonga qo‘shimcha ajratilgan maydonlar bo‘ylab meva ko‘chatlari va sabzavot ekinlari ekishni tashkil etish.

Issiqxona faoliyatidan olingan daromadlari jami daromadlarining kamida 60% ini tashkil etuvchi tadbirkorlik subyektlari uchun 2026-yil 1-yanvardan boshlab 2028-yil oxirigacha ijtimoiy soliq stavkasi 1% miqdorida belgilanadi.

2025-yil 1-oktabr holatiga ko‘ra mavjud bo‘lgan soliq qarzlarini to‘lash muddati foizlar hisoblanmasdan 2028-yil oxirigacha uzaytirildi.

Issiqxona infratuzilmasi — qozonxonalar, mahsulotlarni saralash va qadoqlash, issiqxonalar va kommunal xo‘jalik inshootlari uchun ehtiyot qismlarni saqlash obyektlarini qurish uchun ajratilgan yer maydonining 5%igacha, lekin 20 gektardan ko‘p bo‘lmagan qismidan qishloq xo‘jaligi yerlarining toifasini o‘zgartirmagan holda foydalanishga ruxsat etiladi.

Bundan tashqari, issiqxonalar bilan shug‘ullanuvchi yuridik va jismoniy shaxslar uchun yer solig‘i qishloq xo‘jaligi yerlari uchun belgilangan stavkalar bo‘yicha hisoblanadi. Shu bilan birga, qishloq xo‘jaligiga mo‘ljallanmagan yerlarga nisbatan qo‘llanadigan stavkalar bo‘yicha hisoblangan summalar 2025-yil yanvar oyidan boshlab qayta hisob-kitob qilinadi.

Kredit majburiyatlari bajarilmagani sababli tijorat banklariga o‘tkazilgan yoki garov sifatida saqlanayotgan issiqxonalar va ko‘chmas mulk obyektlari 2028-yil 1-yanvargacha qo‘shilgan qiymat solig‘idan ozod qilinadi. Bundan tashqari, bunday mulklar tijorat banki balansiga qabul qilingan paytdan boshlab, yangi investorga sotilishigacha bo‘lgan davrda yer solig‘idan ham ozod qilinadi.

Biznes-plan ko‘rsatkichlarini (ish o‘rinlari yaratish, mahsulot sotishdan tushgan tushum) 2025−2027-yillarda o‘rtacha 30 foizdan, 2028−2029-yillarda esa 50 foizdan ko‘proqqa bajargan issiqxona xo‘jaliklariga “Tadbirkorlikni rivojlantirish kompaniyasi” tomonidan kompensatsion qo‘llab-quvvatlash qayta tiklanmoqda.

2025-yil 1-oktabrgacha issiqxona loyihalarini amalga oshirish uchun kredit (lizing) olgan barcha toifadagi tadbirkorlik subyektlariga muddati o‘tgan qarzdorlik bo‘lmagan taqdirda foiz stavkasining bir qismi qoplanadi:

• xorijiy valyutadagi kreditlar bo‘yicha — 4% punktidan ortiq miqdorda;
• milliy valyutadagi kreditlar bo‘yicha — 14% punktidan ortiq miqdorda;

Qishloq xo‘jaligini qo‘llab-quvvatlash davlat jamg‘armasi mablag‘lari hisobidan tijorat banklari issiqxona xo‘jaliklariga 12 oy muddatga yillik 14% stavkada imtiyozli kreditlar ajratadi:

• hosil narxining 50%i miqdorida — aylanma mablag‘larni to‘ldirish uchun;
• chang va gazni tozalash uskunalarini o‘rnatish uchun.

Energiya samaradorligini oshirish raqamli platformasi orqali sotib olingan issiqlik nasoslarini o‘rnatish xarajatlarining 20% igacha qismi qoplanadi.