ILMA “City Pay Gate”ga kriptoaktivlar bilan ishlash uchun litsenziya berdi

Istiqbolli loyihalar milliy agentligi “CITY PAY GATE” MCHJ QK ga kripto-depozitariy va kripto-do‘kon faoliyatini amalga oshirish uchun litsenziya berdi. 

Tegishli ma’lumotlar litsenziyalarning elektron reyestriga belgilangan tartibda kiritilgan hamda Agentlikning rasmiy veb-sahifasida foydalanish uchun ochiq hisoblanadi.

Bu kriptodepozitariy litsenziyasiga ega to‘rtinchi va kriptovalyutalar bilan ishlashga ruxsat olgan o‘ninchi kompaniyadir.

“CITY PAY GATE” “Paynet”(45%), “UAB City Pay” (45%) va “Koberidze David” (10%) tomonidan tashkil etilgan.

Eslatib o‘tamiz, O‘zbekistonda kripto-aktivlar bilan bog‘liq faoliyatni litsenziyalash uchun davlat boji stavkalari belgilangan.

Boj miqdori faoliyat turiga bog‘liq bo‘ladi va amaldagi bazaviy hisoblash miqdori asosida hisoblanadi:

• kripto-birjalar uchun — BHMning 73,4 ming baravari (27,5 mlrd so‘m);
• mayning-pullar uchun — BHMning 3 ming baravari (1,1 mlrd so‘m);
• kripto-depozitariylar uchun — BHMning 7 ming baravari (2,6 mlrd so‘m);
• kripto-do‘konlar uchun — 3,7 ming BHM (1,4 mlrd so‘m).