O‘zbekistonda bukmekerlik uchun litsenziya olish jarayoni boshlanmagan

O‘zbekistonda hozircha bukmekerlik kontoralari, onlayn o‘yinlar yoki lotereyalar faoliyatini tashkil etish bo‘yicha birorta ham ruxsatnoma rasmiylashtirilmagan. Bu haqda Istiqbolli loyihalar milliy agentligi (ILMA) kriptoaktivlar aylanmasi sohasini rivojlantirish boshqarmasi boshlig‘i Askarjon Zakirov ma’lum qildi.

Uning so‘zlariga ko‘ra, tadbirkorlar muntazam ravishda maslahat so‘rab murojaat qilmoqda, biroq ruxsatnoma olish uchun rasmiy arizalar hozircha agentlikka kelib tushmagan. Mazkur holat sohada qat’iy nazorat mexanizmlari joriy etilayotgani bilan izohlanmoqda. Ushbu choralar aholining ijtimoiy himoyaga muhtoj qatlamlarini himoya qilish hamda shubhali kompaniyalarning bozorga kirib kelishining oldini olishga qaratilgan.

Sohada shaffoflikni ta’minlash maqsadida Yagona davlat stavkalar va o‘yinchilar reyestri joriy etilmoqda. Platformaning texnik qismi to‘liq tayyor bo‘lib, ayni paytda tizimni ishga tushirish bo‘yicha yakuniy ishlar olib borilmoqda. Zakirovning ta’kidlashicha, potensial bozor ishtirokchilariga yangi talablar va standartlarga moslashish uchun qo‘shimcha vaqt zarur.

Agentlik rahbariyati mazkur sohani qonuniy asosda yuritishga qiziqish yuqori ekanini qayd etdi. Elektron tijoratni tartibga solish boshqarmasi boshlig‘i Kamronbek Muhammadievning ma’lum qilishicha, soha rasman legallashtirilgach, lotereya tashkil etish yoki stavkalar qabul qilish istagida bo‘lgan tadbirkorlar soni sezilarli darajada oshgan.

Eslatib o‘tamiz, 2024-yil aprel oyida Shavkat Mirziyoyev bukmekerlik faoliyatini legallashtirish to‘g‘risidagi qarorni imzolagan edi.