IIV 50 yildan oshgan avtomobillardan foydalanish qoidalarini aniqlashtirdi

Ichki ishlar vazirligi (IIV) ishlab chiqarilganiga 50 yil va undan ortiq bo‘lgan transport vositalaridan foydalanish tartibiga aniqlik kiritdi. Endilikda antikvar deb e’tirof etilgan avtomobillar umumiy cheklovlardan mustasno bo‘lib, ulardan foydalanishga ruxsat etiladi.

Vazirlar Mahkamasining yo‘l harakati xavfsizligini raqamlashtirishga oid qaroriga muvofiq, quyidagi mezonlarga javob beradigan transport vositalari antikvar avtomobil hisoblanadi:

• ishlab chiqarilganiga 50 yil va undan ortiq bo‘lishi;
• asl holati saqlangan bo‘lishi, ya’ni tashqi ko‘rinishi, konstruksiyasi va asosiy agregatlari o‘zgartirilmagan bo‘lishi.

Bunday avtomobillar uchun ANT seriyali maxsus davlat raqam belgilari joriy etiladi.

IIV Jamoat xavfsizligi departamenti ma’lumotiga ko‘ra, fuqarolar 2026-yil 1-fevraldan boshlab hududiy yo‘l harakati xavfsizligi boshqarmalarining ro‘yxatdan o‘tkazish bo‘linmalariga murojaat qilib, antikvar avtomobillarini rasmiy ro‘yxatdan o‘tkazishi mumkin.

Antikvar avtomobillar uchun davlat raqam seriyalari quyidagicha belgilanadi:

• yuridik shaxslarga tegishli antikvar avtomobillar uchun — I, IA, IE, IAE;
• jismoniy shaxslarga tegishli antikvar avtomobillar uchun — III, IIIA, IIIE, IIIAE;
• yuridik shaxslarga tegishli yo‘nalishsiz taksilar uchun — I, IA, IE, IAE tipidagi TTT seriyali raqamlar.

Mazkur o‘zgarishlar antikvar avtomobillarni tarixiy meros sifatida asrash, shuningdek, ularni qonuniy va qulay tartibda ro‘yxatdan o‘tkazishni ta’minlashga qaratilgan.

Eslatib o’tamiz, hukumatning 2026-yil 20-yanvardagi 11-son qarori bilan 2026-yil 1-fevraldan boshlab ishlab chiqarilganiga 50 yil va undan ortiq bo‘lgan avtomototransport vositalaridan foydalanish taqiqlanadi. Ushbu transportlar qayta ro‘yxatdan o‘tkazilmaydi va davlat ro‘yxatidan chiqariladi.

Shuningdek, umumiy vazni (yuki bilan) 44 tonnadan ortiq bo‘lgan yuk avtomobillari, kon, shaxta va karerlarda foydalaniladigan maxsus transport vositalari, yuridik shaxslarga tegishli yo‘nalishsiz taksilar hamda “antikvar” avtomototransportlar uchun alohida seriyali davlat raqam belgilarini joriy etish belgilandi.