Rossiyalik milliarder Gufning albomini $1 mlndan ortiq pulga sotib oldi

Forbes ro‘yxatiga kiritilgan rossiyalik tadbirkor va milliarder Igor Ribakov Gufning “Qadrli shahar” (Gorod dorog) debyut albomini 95 mln rubl (taxminan $1,17 mln) evaziga sotib oldi. U ushbu albomni internetdan butunlay yo‘q qilishni rejalashtirmoqda.

Ribakovning aytishicha, mazkur plastinka uning hayotida vayronkor odatlar bilan bog‘liq davrning foni sifatida muhim rol o‘ynagan. O‘sha paytlarda men chegarada edim, hamma narsadan, hatto oilamdan ham ayrilishim mumkin edi. Bu musiqa men oxir-oqibat tark etishga erishgan turmush tarzini romantiklashtiradi, — deb ta’kidladi u.

Milliarder bu qarorni senzura harakati deb hisoblamasligini alohida ta’kidladi. Uning fikricha, bu yoshlarni zararli ta’sirlardan himoya qilishning bir usulidir: “Hech kim mening xatolarimni takrorlashini istamayman. Albomni o‘chirish — bu mening ongliroq kelajakka qo‘shgan shaxsiy hissam. Bu ishorani men fikr yuritayotgan va ma’no izlayotgan barcha insonlarga yo‘llayapman”.

O‘chirish jarayoni allaqachon boshlangan — albom YouTube, Spotify, Apple Music va boshqa striming platformalaridan yo‘qola boshlagan.