Go‘sht importi uchun tadbirkorlarga subsidiya ajratiladi

O‘zbekistonda go‘sht mahsulotlari narxlarini barqarorlashtirish maqsadida tadbirkorlarga subsidiya ajratish tartibi joriy etildi. Bu Prezidentning “Aholini asosiy turdagi oziq-ovqat mahsulotlari bilan ta’minlashni qo‘llab-quvvatlashning qo‘shimcha chora-tadbirlari to‘g‘risida”gi qarorida belgilandi.

Hujjatga ko‘ra, 2026-yil 1-apreldan 1-avgustgacha tadbirkorlarga mol va qo‘y go‘shtini import qilishda havo transporti xarajatlarining 50% qismi qoplab beriladi. Bunda subsidiya miqdori har bir kilogramm go‘sht uchun $0,8 dan oshmaydi.

Shuningdek, 2026-yil 1-apreldan 31-dekabrgacha xorijdan havo transporti orqali olib kiriladigan nasldor qoramollar qiymatining 10% qismi subsidiya qilinadi. Ushbu to‘lov har bir bosh qoramol uchun 4 mln so‘mdan oshmasligi belgilangan.

Mazkur subsidiyalarni moliyalashtirish Aholini agrar sohada qo‘llab-quvvatlash jamg‘armasi mablag‘lari hisobidan amalga oshiriladi.