“Gʻishtko‘prik” chegara bojxona posti 5-fevraldan boshlab 4 oyga yopiladi

2025-yilning 5-fevralidan boshlab “Gʻishtko‘prik” chegara posti 4 oy muddatga yopilmoqda. Bu haqda Bojxona Qo‘mitasi ma’lum qildi. 

Xabarda aytilishicha, cheklov postdagi ulkan qurilish va rekonstruksiya ishlarini mantiqiy nihoyasiga yetkazish maqsadida amalga oshirilmoqda. Xususan, postda vaqtinchalik binolarni demontaj qilish, hududni obodonlashtirish, postga tutash hududda zarur infratuzilmani tashkil etish nazarda tutilgan.

“Gʻishtko‘prik” chegara posti harakatlanayotgan fuqarolar va transport vositalarining harakati “Navoiy” chegara bojxona postiga yo‘naltiriladi. 

Yangidan zamonaviy tarzda bunyod etilgan “Navoiy” chegara bojxona posti ham Toshkent viloyatining Toshkent tumanida joylashgan bo‘lib, “Gʻishtko‘prik” postiga yaqin hudud hisoblanadi. 

Jismoniy shaxslar, yengil avtomobillar va avtobuslar harakati uchun qulay bo‘lishini ta’minlash maqsadida “Navoiy” chegara bojxona postida yuk avtotransport vositalari harakati cheklanadi.