Qozog‘istonning FlyArystan kompaniyasi Toshkentga aviaqatnovlarni yo‘lga qo‘yadi

15-iyul kuni Toshkentga FlyArystan aviakompaniyasining yangi Atirau – Toshkent – Atirau yo‘nalishi bo‘yicha birinchi reysi yetib keldi. Bu haqda “Uzbekistan Airports” matbuot xizmati xabar berdi.

Samolyot soat 13:50 da qo‘ndi. Bortda 139 nafar yo‘lovchi bor edi.

Mazkur yo‘nalish Qozog‘iston loukosterining xalqaro tarmog‘ini kengaytiradi va Qozog‘iston bilan O‘zbekiston o‘rtasidagi transport aloqasini yaxshilaydi.

Ushbu reys mamlakatlar o‘rtasidagi ishbilarmonlik, madaniy va sayyohlik aloqalarini mustahkamlaydi. Shuningdek, u FlyArystan’ning Nur-Sulton-Toshkent yo‘nalishini to‘ldirib, Qozog‘istonning g‘arbiy hududlari bilan to‘g‘ridan-to‘g‘ri aloqani ta’minlaydi, — dedi aviakompaniya prezidenti Richard Ledjer.

Parvozlar quyidagicha amalga oshiriladi:

• iyul va avgust oylarida — payshanba va yakshanba kunlari;
• sentabr va oktabr oylarida — dushanba, chorshanba va juma kunlari.

Parvoz davomiyligi 2 soat 20 daqiqani tashkil etadi. Reyslarga Airbus A320 samolyotlari xizmat ko‘rsatadi.

FlyArystan — Qozog‘istonning birinchi loukoster aviakompaniyasi bo‘lib, 2019-yildan beri faoliyat yuritmoqda va Air Astana guruhiga kiradi.