O‘zbekistondan eksport tashuvlari chorak davomida 37% ga kamaydi

2025-yilning uchinchi choragida respublikadan tovar eksportiga berilgan arizalar soni 37% ga kamaydi.

Ma’lumotlarga ko‘ra, 2025-yilning uchinchi choragida O‘zbekistondan chet davlatlarga yuk tashish bo‘yicha arizalar soni 2024-yilning shu davriga nisbatan 9% ga oshgan. Biroq avvalgi chorak bilan solishtirilganda talab sezilarli darajada — 37% ga kamaygan. So‘nggi uch oy ichida yetkazib berishning o‘rtacha qiymati ham 7% ga pasaygan.

Eng katta qisqarish Rossiya (-38%), Qozog‘iston va Belarus yo‘nalishlarida kuzatilgan.

Shu bilan birga, import yuk tashishlarida ijobiy o‘sish qayd etildi. Yiliga nisbatan O‘zbekistonga mahsulot olib kirish bo‘yicha buyurtmalar soni 56% ga, o‘tgan chorakka nisbatan esa 58% ga oshgan. Narxlar esa bir yil ichida 11% ga ko‘tarilgan. Ayniqsa Rossiya, Qozog‘iston va Belarusdan yuk tashishlarga bo‘lgan talab bir yarim barobardan ortiq oshgan.

Ichki yuk tashishlar ham faol rivojlanmoqda. Yil davomida mamlakat ichkarisida mahsulot yetkazib berish bo‘yicha arizalar soni 83% ga, ikkinchi chorakka nisbatan esa 38% ga ko‘paygan. 2025-yilning to‘qqiz oyi yakunlariga ko‘ra, buyurtmalar soni 81% ga, xizmatlar qiymati esa 44% ga oshgan.

ATI.SU yuk tashish birjasining O‘zbekistondagi vakolatxonasi direktori Farid Vahidovning ta’kidlashicha, eksport yuk tashishlarining sekinlashuvi, ehtimol, Qozog‘iston–Rossiya chegarasidagi vaziyat bilan bog‘liq. Sentabr o‘rtalaridan boshlab bu yerda yuk avtomobillaridan iborat uzun navbatlar hosil bo‘lgan. Uning so‘zlariga ko‘ra, Rossiyaga potensial sanksiyaga tushishi mumkin bo‘lgan mahsulotlarni olib kirishga nisbatan kuchaytirilgan nazorat Markaziy Osiyodagi barcha mamlakatlardan yuk oqimiga salbiy ta’sir ko‘rsatgan. Mutaxassisning fikricha, bu murakkabliklar O‘zbekistonning eksport salohiyatini to‘rtinchi chorakda ham cheklab turadi.