Piskent avtopoligonida sinovlar uchun elektron navbat ishga tushiriladi

Piskent avtopoligonida avtotransportlarni sinovdan o’tkazishda elektron navbat tizimi joriy etildi. Bu haqda UzTest matbuot xizmati xabar berdi.

Unga ko’ra, endi M1 toifadagi yengil avtotransport vositalarining muvofiqligini baholashga navbatni onlayn olish imkoniyati yaratiladi.

Bunda, dastlab Bojxona qo‘mitasining “Yagona darcha” axborot tizimi orqali sertifikatlashtirish organiga elektron ariza yuborish kerak. Sertifikatlashtirish organining mas’ul xodimi tomonidan mahsulotni tanlab olish bayonnomasi elektron tizimda rasmiylashtirilgan bo‘lishi zarur.

Keyin elektron navbat olish uchun Yagona portal yoki uning mobil ilovasi orqali ro‘yxatdan o‘tib, xizmatdan foydalanish mumkin. Portaldagi “Transport vositalarining muvofiqligini baholashga navbat olish” bo’limiga kirib, “Xizmatdan foydalanish” tugmasi orqali avtotransport vositasi, tashrif sanasi va vaqti belgilanadi hamda maxsus QR-kod olinadi.

Laboratoriyaga belgilangan vaqtdan avvalroq borib, tayyorgarlik ko‘rib turilishi kerak. Maxsus QR-kodni ko‘rsatish orqali kirish uchun elektron tizimdan talon olinadi va chaqiriq bo‘yicha laboratoriyaga kiriladi.

Xizmatdan foydalanish bepul, buning uchun hech qanday hujjat talab etilmaydi.

Elektron navbat orqali murojaatchilarning vaqti tejalishi bilan birga, tamagirlik va korrupsion holatlarning oldi olinishi mumkinligi qayd etilgan.

Bundan oldin, O’zbekistonda norasmiy dilerlarga elektromobillarni elektromagnit tekshiruvidan o’tkazish belgilangani va sinovlar Piskent avtopoligonida o’tkazilishi haqida xabar berilgandi.