O’zbekistonda BYD elektromobillari ishlab chiqarish ko’payadi

O’zbekiston BYD elektr va gibrid avtomobillarini ishlab chiqarishni yiliga 500 mingtaga yetkazishni rejalashtirmoqda. Bu haqda Adliya vazirligi matbuot xizmati xabar berdi.

Prezident Shavkat Mirziyoyev O’zbekistonda elektromobillar va gibrid avtomobillar ishlab chiqarish bo’yicha investitsiya loyihasini amalga oshirish to’g’risida qaror qabul qildi.

Ushbu qarorga binoan investor bilan quyidagi masalalar muhokama qilinadi:

• Ishlab chiqarish quvvatlarini yiliga 500 ming dona elektr va gibrid avtomobillarga bosqichma – bosqich oshirish.
• Kelajakdagi avtomobil modellari uchun mahalliylashtirish darajasini 60% gacha oshirish.
• Mahalliy aholi uchun 10 mingta yangi ish o’rinlari yaratish.
• Qo’shma korxona tomonidan belgilangan mamlakatlarni hisobga olmaganda, avtomobillar yetkazib beriladigan mamlakatlar ro’yxatini kengaytirish.
• Iste’molchilar manfaatlarini himoya qilish, avtomobillarning mahalliy iqlim sharoitlariga muvofiqligini ta’minlash va kafolatli xizmat ko’rsatish choralarini ishlab chiqish.
• Qonun hujjatlariga muvofiq barcha avtomobil korxonalari, shu jumladan investor uchun teng sharoitlarni ta’minlash.

Eslatib o’tamiz, O’zbekiston ham BYD elektromobillarini import qilishga cheklovlar qo’ymoqchi. Xitoy kompaniyasi respublika hukumatidan «mahalliy iqlim va yo’l sharoitlariga mos kelmaydigan va rasmiy kafolatga ega bo’lmagan elektr transport vositalarining tartibsiz importini» cheklashni so’radi.

O’tgan yilning sentabr oyida «O’zavtosanoat» va BYD Europe B. V. (Niderlandiya) elektromobillar ishlab chiqarish uchun «BYD Uzbekistan Factory» nomi bilan qo’shma korxona tashkil etishgan. «O’zavtosanoat» 60% ulushga ega, BYD Europe B. V. esa 40% ulushga ega.