Toshkent aeroportida uchib kelish zali E-Gate tizimi bilan jihozlandi

Toshkent xalqaro aeroportining uchib kelish zalida avtomatlashtirilgan E-Gate pasport nazorati tizimi ishga tushirildi. Bu haqda Uzbekistan Airports xabar bermoqda.

Yangi o‘tish joylari O‘zbekiston fuqarolari uchun mo‘ljallangan sakkizta elektron yo‘lak bilan jihozlangan.

Yo‘lovchilar shunchaki biometrik pasportlarini ma’lumot tekshiruvchi skanerga qo‘yadi va identifikatsiya qilish (Face ID) protsedurasidan o‘tadi. Shaxs tasdiqlanganidan so‘ng, turniket avtomatik ravishda ochiladi. Butun jarayon taxminan 15−20 soniya davom etadi.

Ta’kidlanishicha, E-Gate tizimi birinchi marta 2023-yilda Toshkent aeroportida xalqaro terminalning jo‘nash zalida joriy etilgan. Ushbu yangi tizim yordamida poytaxt aeroportidagi avtomatlashtirilgan yo‘laklarning umumiy soni 20 taga yetgan.