“Click”ning sof foydasi 37,5%ga oshdi

Joriy yilning 9 oyi davomida “Click” to‘lov tizimi 179,2 mlrd so‘mdan ortiq sof foyda ko‘rdi. Bu ko‘rsatkich o’tgan yilning shu davriga nisbatan 37,5%ga ko‘p. Bu haqda “Kapital.uz”ga kompaniya matbuot xizmati xabar berdi.

“Click” aktivlari yil boshidan beri 18,5 mlrd so‘mga oshib, 266,8 mlrd so‘mni tashkil etgan. Kompaniyaning jami kapitali esa 49,7%ga o‘sib, 109,3 mlrd so‘mga yetgan.

Kompaniya sof tushumlari 2023-yilga nisbatan 35%ga yuqorilab, qariyb 421 mlrd so‘mni tashkil etgan. Yalpi foyda 37%ga ko’payib 397 mlrd so‘mni qayd etgan.

Shuningdek, kompaniya xarajatlari 225,1 mlrd so‘mgacha ortgan. Uning asosiy qismi realizatsiya xarajatlaridan (148 mlrd so‘m), qolgan chiqimlar ma’muriy (39 mlrd so‘m) hamda boshqa operatsion xarajatlardan iborat (37 mlrd so‘m).