O‘zbekiston Rossiyaga Chery avtomobillari uchun ehtiyot qismlar yetkazib beradi

Toshkent viloyati hokimligi xabar berishicha, “Technologies of Real Time” avtomobil ehtiyot qismlari zavodi Rossiyaga Chery avtomobillari uchun butlovchi qismlarni yetkazib berishni boshlashi mumkin.

Moskva viloyati investitsiyalar, sanoat va fan ishlari bo‘yicha vazir o‘rinbosari Adil Gantsov boshchiligidagi delegatsiya Zangiota tumanidagi qo‘shma korxonaga tashrif buyurdi. Tashrif O‘zbekistonda o‘tkazilayotgan “Innoprom. Markaziy Osiyo” xalqaro sanoat ko‘rgazmasi doirasida amalga oshirildi.

Mehmonlar ishlab chiqarish jarayonlarini o‘rganib, shourumdagi mahsulotlar bilan tanishdilar. Delegatsiya O‘zbekiston-Singapur qo‘shma korxonasi vakillari bilan avval zavodda, keyin esa “Innoprom” ko‘rgazmasi maydonlarida muzokaralar olib bordi.

Tomonlar Solnechnogorskdagi “Yesipovo” sanoat parki hududida joylashgan Chery zavodiga avtomobil ehtiyot qismlarini yetkazib berish bo‘yicha kelishuvga erishishdi.