O‘zbekistonda 1-maydan boshlab fuqarolar uchun bojsiz tovarlar olib kirish chegaralari pasayadi

Hukumat jismoniy shaxslar tomonidan tovarlarni bojsiz olib kirishning yangi qoidalarini tasdiqladi. Vazirlar Mahkamasining qarori Lex.uz portalida e’lon qilinib, 1-maydan kuchga kiradi.

Yangi me’yorlarga ko‘ra, fuqarolar shaxsiy foydalanish uchun tovarlarni quyidagi miqdorlarda bojxona to‘lovlarisiz olib kirishlari mumkin:

• havo transporti orqali — $1000 gacha (avval — $2000 gacha);
• temir yo‘l va suv yo‘llari orqali — $500 gacha (avval — $1000 o‘rniga);
• xalqaro kuryerlik xizmatlari orqali — oyiga $200 gacha (avval — har chorakda $1000).

Chegarani avtomobil va piyodalar o‘tish punktlari orqali kesib o‘tishda $300 lik, xalqaro pochta jo‘natmalari uchun $100 lik limit o‘zgarishsiz qolmoqda.

Shuningdek, quruq sutni olib kirishga qo‘yilgan barcha taqiqlar bekor qilindi. Bu haqda Prezident Shavkat Mirziyoyev 18-aprel kuni bo‘lib o‘tgan yig‘ilishda tegishli qarorni e’lon qildi. Shu bilan birga, oq shakarga aksiz solig‘i bekor qilinishi e’lon qilindi.

20-iyuldan boshlab BFQlarni (biologik faol qo‘shimchalar) olib kirish bo‘yicha yangi qoidalar joriy etiladi:

• 10 flakon suyuq qo‘shimchalar (shu jumladan siroplar);
• 0,5 kg gacha kukunlar yoki quritilgan o‘simlik komponentlari (gullar, ildizlar va boshqalar);
• ko‘pi bilan 100 ta tabletka, 100 ta kapsula yoki 4 ta PET-qadoqdagi kapsula.

Shuningdek, tamaki mahsulotlarini bojsiz olib kirish chegaralari aniqlashtirildi:

• sigaretalar — 200 donagacha;
• sigaralar — 5 donagacha;
• boshqa shakldagi tamaki — 100 grammgacha.

20-iyuldan boshlab parfyumeriya mahsulotlarini olib kirishga ham cheklovlar joriy etiladi: umumiy hajmi 300 ml dan oshmaydigan uchta flakongacha ruxsat beriladi.

Eslatib o‘tamiz, ilgari yagona norma — barcha turdagi mahsulotlarga 10 qadoqqacha amal qilardi.